Среда, 16.01.2019, 06:29
Приветствую Вас, Гость
Главная » Файлы » Мокшанский сундучок » Поэтический альбом

Стихт сёксеть колга
17.10.2015, 21:08

Сёксесь сась, и мазомсь пизелкссь,

Кона вальмалонк минь касы.

Мярьгат, ёфси толса палы,

Якстерь кстыдонза сонь эса.

 

Пуромсть нармоннятне, кенярдсть,

Пизелкскять эсь кяльсост шназь.

Тялонда аф весть сей лиихть,

Ярхцамбяльда лама тяса.

************************************************************************************************

Эжди кальдявста шинясь,

Ётась лямбе кизонясь.

Пяк нюрьхкяня ульсь сонь киц,

Ашезь сата тейнек псиц.

 

Сёксесь салаване шаштсь,

Кизоть васькафтома маштсь.

Менельсь комачаф туцяса,

Сетьмость вайгяльхне ульцяса.                       Николай КАВКАЕВ.

***********************************************************************************************

Сёксенда.

Ушесь - начка.

Вармась - пачкат.

Тусь шинясь.

                                            Шамсь ульцясь.                                              

 А.ЕЖОВ

***************************************************************************************************

Сёксесь суви.

Сёксесь пине лаца суви,

Шуфтонь пяярьф лопат луви:

- Сяда, тёжянь, миллион...

Вов мон сёксян! Вов тя  мон!

Тага вармать мархта саян,

Шуфттнень ёткова мон шаран,

Лядыкс лопаняснон салан,

Пильге алу эсост маран.-

Ётай пинге - лямбось сай,

Лямбось тевонцты кундай,

Кандсы модать пиженянц,

Эрек панчфонь палянянц.  А.ЕЖОВ

*******************************************************************************************************

ТУНДА МРДАЙХТЬ

Садса имошне ни кенерсть,

Лоткась эждема шинясь.

Нармоннятне маряфтсть сёксеть,

Лямбе шири сяс срхкасть.

                      Ванан мельгаст пара мяльса,

                      Синь ки лангсост -пантт и ляйхть,

                      Азозь тейне нармонь кяльса,

                     Мяк тунда, кле, мрдайхть.

СЁКСЕ

Вага тага сёксесь сась,

Танцти марьнят тейнек кандсь.

Кржас пиндолды шинясь,

Рдазу арась ни кинясь.

*****************************************************************************************************

СЁКСЕ

Золод сёксесь сась!

Порать ётаса.

Порань масторлангсь

Ацаф лопаса.

Менельсь аварди

И аф аварди,

Седись сяворды

И аф сяворды.

Шавот паксятне,

Шавот перетне,

Тиезь тевснон лац

Велень эряйхне.

Сёксе, сёксеня,

Козя пингоня,

Кельгсян сёксенять,

Кельксян эрь шиня.

автор.

*******************************************************************************************************

ЯКАЙ СЁКСЕСЬ

Вирьхнень келес якай сёксесь,

Байдексонза шуфттнень токси.

Сон руцяснон валхни- срафни.

Зрнянь лопат алу прафни.

Шуфттне учихть, тялось сай,

Прязост акша вазънят стай. 

                          Роман Федькин

Сёксесь тага вирть тюжаса вади,

Келунять руцяс стай золод панкст,

Мекки сязьсы прястонза и Ванды

Ацасы сонь начка модать лангс.

*************************************************************************************************** 

Лядыкс лопанянза шарыхть -тиихть,

Валгихть алу, пизем путькса штафт,

Бта каркне, конат югу лиихть,

Пращамс толганеснон тяза прафтсть.

*****************************************************************************************************

Сёксесь якафтозе ушеть.

Валги лопатне тюжат.

Югу нармоннятне тушендсть

Фкявок морня аф кулят.

******************************************************************************************************

Келусь ащи пичедезь и арьси

Кельмоть колга, кона курок сай,

Кона пиже порфса ронгонц шарсы,

Лешса кажнай тарадть лангс уфай.

*******************************************************************************************************

 

Категория: Поэтический альбом | Добавил: НЕлена
Просмотров: 769 | Загрузок: 0 | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]